ROXAS CITY – Nag-organisar sang isa ka pagsinapol ang Office of the Municipal Agriculturist sa banwa sang Jamindan agud hinalaaan ang mga tikang angut sa paglikaw sa African Swine Fever (ASF).
Ini ang ginkumpirma ni Hon. Mac Artur Valdemar, alkalde sang nasambit nga banwa, sang mainterview sang Bombo Radyo.
Suno kay Valdemar, ini nga pagsinapol ang pagsabat sa panawagan sang gobyerno probinsyal nga magdihon sang tikang ang tagsa ka Local Government Unit (LGU) agud malikawan nga makasulod ang virus sa mga baboy, sa ila banwa.
Sa nasambit nga pagsinapol, ginpatawag ang kutob sa mga pork vendors sa merkado ukon sa mga dalanon, sa ila banwa kag nakasugtanan ang mga masunod nga tikang:
-Kinahanglan nga maga-agi sa ila slaughterhouse ang ginakatay nga baboy
-Ginadumilian ang pagbaligya sa mga dalan, sa baylo, may igapahamtang nga isa lamang ka lugar ang kada barangay nga diri makabaligya ang mga pork vendor, agud mahupos sila nga mamonitor, kag
-Kinahanglan nga ipahibalo sang mga tag-iya sang baboy sa ila barangay opisyal ukon sa Agriculturist kun may sintomas sang ASF ang ila kasapatan.
Ginpahayag man sang alkalde nga may puder ang ila Jamindan ASF Taskforce nga magkumpiskar sang mga baboy nga madakpan nga magalapas sa ginkasugtan nga pagsulondan.
Sa karon, wala sang nabalhag nga napatay nga baboy sa ila banwa.
