MANILA, Philippines – Luyag ni President Ferdinand Marcos Jr. nga mas mapalig-on pa ang papel sang Canada bilang isa ka importante nga kaalyado sang Pilipinas sa pagmintinar sang kalinong kag seguridad sa Indo-Pacific region.
Antes pa man ang flight pakadto sa Vancouver para sa iya state visit, ginpahayag sang Presidente nga pagaestoryahan nila ni Canadian Prime Minister Mark Carney ang hugot nga kooperasyon sa depensa, seguridad, ekonomiya, trade kag investment.
Ginpahayag man ni Pres. Marcos Jr., ang pagpasalamat sa padayon nga suporta sang Canada sa posisyon sang Pilipinas may kaangtanan sa West Philippine Sea kag sa pagpbantay sang soberanya sang pungsod.
Lakip man sa ila agenda ang pag negosasyon para sa Canada-ASEAN Free Trade Agreement, nga ginapaabot makahatag sang dugang nga benepisyo sa ekonomiya sang Pilipinas.
Samtang, magapakigkita man ang Presidente sa mga Canadian investors kag business leaders agud mapalapad pa ang kooperasyon sa mga sektor pareho sang mining, renewable energy, information technology kag telecommunications.
Sa karon ginalauman magpakig-angot man si Marcos kag First Lady Liza Araneta-Marcos sa Filipino community sa Vancouver bilang pagpasidungog sa ila kontribusyon sa relasyon sang Pilipinas kag Canada.
