Ginmando ni President Ferdinand Marcos Jr. sa kapulisan kag iban pa nga law enforcement agencies para sa istrikto kag gilayon nga pagpatuman sang layi agud mapanabat ang mga involved sa kaso sang mga nadula nga mga manugbulang.
Suno kay Palace Press Officer Undersecretary Claire Castro, maathag ang direktiba sang Presidente nga ipatuman ang nagaluntad nga kasuguan, lakip na ang gilayon nga pagdakop sa mga may arrest warrant.
Una na nga nagpaguwa ang Regional Trial Court sang Sta Cruz, Laguna sang arrest warrants batok sa mga akusado lakip na ang negosyante nga si Charlie Atong Ang sa kaso nga kidnapping kag serious illegal detention may kaangtanan sa pagkadula sang pila ka mga manugbulang.
Matandaan nga naglab-ot sa 34 ka mga manugbulang ang ginreport nga nadula halin pa sang tuig 2021 tubtob 2022, nga ginasuspetsahan nga may kaangtanan sa match-fixing ukon pangpangdaya sa bulang.
Nahibaluan nga kahapon nga aadlaw, ginserbe sang Philippine National Police ang mandamiento de aresto batuk sa negosyante nga si Atong Ang apang wala makita ang negosyante.
