Nagmando si President Ferdinand Marcos Jr sang bug-os nga implementasyon sang Sagip Saka Act.
Ini matapos nga ginpirmahan sang Presidente ang Executive Order No.101 para masiguro ang mas mataas nga produksyon sang pagkaon, malig-on nga presyo, kag mas maayo nga palangabuhian sang mga mangunguma kag mangingisda.
Sa idalum sang EO 101, ang tanan nga ahensya sang gobyerno, Government-Owned or -Controlled Corporation (GOCCs), State Universities and Colleges (SUCs) kag Local Government unit (LGUs) ginamanduan nga lubos nga ipatuman ang Sagip Saka Act (RA 11321), nga nagatuyo sa pagpasanyog sang mga negosyo sa agrikultura kag pangisda paagi sa paghanas, suporta sa merkado, kag direkta nga pagbakal sang mga produkto gikan sa mga kooperatiba sang mangunguma kag mangingisda.
Gintalana man sang Executive Order ang Department of Agriculture nga magtukod sang Sagip Saka Desks sa mga rehiyon agud magserbe nga sentro sang impormasyon kag koordinasyon.
Pahayag pa, isa ini ka importante nga tikang agud mabuhinan ang kaimulon sa sektor sang agrikultura kag pangisda, kag masiguro ang mas malig-on nga suplay sang pagkaon kag mas inklusibo nga pag-uswag sa kaumhan.
