Ginpahayag ni President Ferdinand “Bongbong” Marcos Jr. nga wala sang ‘significant’ effect sa ekonomiya sang Pilipinas ang tensyon sa Middle East.
Ini ang ginpahayag ni Marcos sa ginhiwat nga pagsinapol subong nga adlaw nga may katuyuan nga usisaon ang mga epekto sang giyera sa tunga sang Israel kag Iran, partikular na sa presyo sang gatong.
Ginpahayag ni Department of Energy officer-in-charge Sharon Garin nga sang Martes, Hunyo 24, ang average nga presyo sang krudo ang yara sa $69 kada bariles matapos ipahayag ni President Donald Trump sang Estados Unidos nga may ceasefire na sa tunga sang Israel kag Iran.
Nahibaluan nga ginhinyo man ni Trump sa magtimbang nga bahin nga indi paglapason ang ceasefire.
Bangud sa pagbag-o sa presyo sang krudo, ginpahayag ni Garin nga mahimo nga indi na kinahanglan nga i-activate ang fuel subsidy program sang gobyerno para sa sektor sang pampasahero nga transportasyon kag agrikultura.
Samtang, nagapanawagan man si Marcos para sa malinong kag diplomatiko nga solusyon kasunod sang mga pag-atake sang puwersa sang Estados Unidos sa tatlo ka nuclear sites sa Iran.
Ginpasiguro man ni President Marcos sa mga Pilipino nga apektado sang tensyon nga handa ang gobyerno nga magbulig sa ila.
