CAPIZ – Ginkilala nga kampeon ang banwa sang President Roxas sa ginpatigayon nga 1st Capiz Provincial Rescue Olympics 2025 nga ginhiwat sa Villareal Stadium sa Roxas City.
Sa interview sang Bombo Radyo kay Frederick Earl Burgos, LDRRMO V sang President Roxas Capiz, suno sa iya masobra isa ka bulan ang preparasyon sang ila nga grupo para man sini sa ginhiwat nga rescue Olympics.
Dugang pa sini, nga nagpangibabaw ang ila nga grupo sa nagkalain-lain nga kategorya pareho sang Toughest Rescuer Challenge, Best in Bandaging, kag Best in Patient Packaging. Bangud sini, nakuha nila ang titulo bilang overall champion sa kompetisyon.
Ang nasambit nga grupo ginabug-usan sang Municipal Disaster Risk Reduction and Management Office (MDRRMO) kag Active Lutod-Lutod Emergency Response Team (ALERT).
Ang Rescue Olympics ginpasakupan sang nagkalain-lain nga DRRMOs sa probinsya, maluwas sa pila ka banwa pareho sang Cuartero, Dumarao, Tapaz kag Panay.
Ini nga aktibidad gin-organisar sang Capiz Provincial Disaster Risk Reduction and Management Office (PDRRMO) bilang kabahin sang kampanya nga mapasangkad ang kahandaan kag kapasidad sang mga local disaster response teams sa pag-atubang sang emerhensya.
Samtang ginahiwat ang kompetisyon, pormal man nga gintugyan ni Governor Fredenil H. Castro ang pila ka emergency equipment sa nagkalain-lain nga ahensya sang gobyerno. Lakip sa nakabaton sang kagamitan amo ang Bureau of Fire Protection, Philippine Red Cross – Capiz Chapter, kag Lawaan Integrated School.
Ginpahayag ni Governor Castro nga ini nga aktibidad kabahin sang padayon nga suporta sang Gobyerno Probinsyal sa mga inisyatibo para sa kahandaan kag epektibo nga pagresponde sa mga emerhensya sa probinsya sang Capiz. Ginpasalig man sini ang bug-os nga suporta sang probinsya sa mga ahensya kag grupo nga nagatipan sang kabuhi kag seguridad sang mga Capisnon
