Gintawag ni Presidente Ferdinand “Bongbong” Marcos Jr. nga isa ka sahi sang economic sabotage ang mga ginapahayag maanomaliya kag “ghost” flood control projects nga natukiban sa pila ka bahin sang pungsod, partikular sa probinsya sang Bulacan.
Sa isa ka interview kadungan sang iya nga pagbisita sa Barangay Piel, Baliuag, hugot nga ginsiling sang Presidente nga mahimo nga mag-file sang kaso batok sa mga involved sa mga proyekto nga flood control nga nareport nga tapos na, apang sa aktwal wala pa gali matukod.
Isa sa mga proyekto nga iya nga personal nga gin-inspeksyon amo ang reinforced concrete riverwall nga ginreport sang Department of Public Works and Highways (DPWH) nga “kumpleto na,” apang sa iya nga aktwal nga pagbisita, wala sang kun ano man nga istruktura nga nagatindog.
Suno sa iya, kun maayos lang kuntani nga ginpangtukod ang mga flood control projects, dako kuntani ang nabulig sini sa irigasyon kag pagbuhin sang mga pagbaha sa mga komunidad.
Dugang pa sang Presidente, may legal team na nga sa karon naga-usisa sa mga dokumento kag ginaimbestigaran ang mga kontrata sang dalagkuan nga mga contractor agud hibaluon kun nagasanto ang mga report sa mga reklamo nga nagakabaton nagikan sa publiko.
Ginbuyagyag man sang Presidente nga sa kabug-usan nga P545 bilyon nga badyet para sa 9,855 flood control projects, yara sa 20% sini ang nagkadsto lang sa 15 ka mga kontratista. Mangin ang mga kontrata sang pila ka mga proyekto sa nagkalain-lain nga lugar ang may insakto nga balor, disenyo, materyales, kag kalabaon —apisar nga lain ang lokasyon kag kadutaan, nga kaangay indikasyon sang sistematiko nga anomaliya.
Sa ulihi, ginsiguro ni Marcos nga pagalagson ang mga involved kag pagapasabton sa layi.
