Kasado na sa Setyembre 10 ang tapatan nanday anay US President Donald Trump kag US Vice President Kamala Harris para sa presidential debate.
Ini ang matapos ginkumpirmar sang news division sang US broadcasting company. Ang mga ini ang maga-host ang pinakauna nga debate sa tunga nanday Trump kag Harris.
Sang tinalikdan lang nga adlaw sang Huwebes, nauna na nga ginpahayag ni Republican candidate Trump sa press conference sini sa Mar-A-Lago, Palm Beach, Florida nga bukas ini nga makipag-debate sang pila ka beses sa makasambuwa sini sa election nga si VP Harris sang Democratic Party bag-o ang pagpiniliay sa Nobiyembre para sa mangin masunod nga Presidente sang Amerika.
Sa hubon naman ni VP Harris, ginkumpirmar naman sini nga magatambong ini sa debate sa nasambit nga network samtang yara ini sa isa ka event sa Michigan kag bukas man ini sa pagtambong sa mga dugang pa nga mga debate.
Matandaan nga nakatalana kuntani ang ikaduha nga debate nanday Trump kag US President Joe Biden sa Setyembre 10 apang, nag-withdraw ini sa presidential race matapos ang mahina nga performance sini sa debate batuk kay Trump sang Hunyo nga nagresulta sa panawagan sang pila ka Democrats nga mag-withdraw na ini.
Naghatag naman ini sang paagi sa iya nga ikaduha nga presidente nga si VP Harris para magbulos sa iya kag mangin nominee sang Democratic party.
