ROXAS CITY – Amat-amat nga nagataas ang presyo sang asukar sa Teodoro Arcenas Trade Center (TATC) apisar bastante ang suplay.
Sa pagpakig-angut sang Bombo Radyo sa pila ka sugar vendors, ila ginsiling nga kabangdanan sang ila pagpataas bangud nagtaas man ang baligya sa ila sang ila supplier nga gikan sa probinsya sang Antique kag Negros Occidental.
Mahibaluan nga ang brown sugar may presyo sang P60/kilo sadto, subong mabakal sa P75 kag ang isa ka saku sini nga sadto mabakal sa P2,000, subong P2,700-2,800 na.
Samtang ang Muscovado nga gikan sa P60/kilo nagtaas sa P65 tubtob P70 kag ang isa ka saku sini mabakal sadto sa P2,600, subong P3,000 na ang presyo.
Ang refined washed sugar naman nga anay P80/kilo, mabakal na sa P90-P95 kag ang isa ka saku sini mabakal sadto sa presyo nga P3,800 subong nagalab-ot na sa P4,000-P4,300.
Suno sa mga vendors, indi mahimo nga indi sila magpataas bangud dako ang ila kapiyerdihan kun ipabilin nila sa anay presyo ang mga asukar.
