Nagnubo ang presyo sang karne sang baboy kag manok, apang nagapabilin nga mahal sa mga merkado ang iban nga mga utanon kaangay sang ahos kag sibuyas.
Ini ang ginmonitor sang Price Watch sang Department of Agriculture (DA) matapos ini nga gin-inspeksyon sang Biyernes ang sa Agora Market sa Navotas, kaupod ang Department of Trade and Industry (DTI).
Matapos mag-igo sa P450 kada kilo, nagnubo sa P370 kada kilo ang presyo sang liempo. Ang kasim kag pigue nga sang una halos P400 kada kilo ang sarang na lang mabakal sa P330 kada kilo.
Ang manok nga nagabili sang P220 kada kilo, mahimo na nga mabakal sa P165 kada kilo.
Suno kay Agriculture Secretary Francisco Tiu Laurel Jr., ang pagnubo sang presyo sang lokal nga manok ang bangud sa pagsaka sang produksyon sini.
Sa pihak nga bahin suno sa natungdan, nagnubo ang presyo sang karne sang baboy bangud sa pagsulod sang imported nga karne sang baboy kag dako na karon ang supply sini sa mga food storage.
Ang presyo sang ahos naglab-ot sa P160 kada kilo gikan sa nagligad nga P100 kada kilo. Nagtaas ang presyo sang sibuyas sa P160 kada kilo halin sa P120 kada kilo.
Samtang sa bulan sang Nobyembre, nalakip man sa P20 kada kilo sang bugas ang mga tricycle drivers. Sa pihak sang nagadamo nga numero sang mga benepisyaryo, ginpasiguro sang DA nga bastante ang supply sang bugas sa bug-os nga pungsod.
