Ginpahulag na sang Department of Trade and Industry (DTI) ang monitoring team sini, agud hibaluon kun nagasunod ang mga supermarket kag grocery sa price freeze sa mga lugar nga ginpaidalom sa state of calamity kasunod sang halit ni super typhoon Carina kag Habagat.
Sa idalom sang Price Act, ang basic necessities ang awtomatiko nga ginapaidalom sa price freeze nga indi magasobra sa 60 ka adlaw.
Ginapaidalom sang Metro Manila Council (MMC) sa state of calamity ang bilog nga National Capital Region (NCR) sang tinalikdan nga adlaw sang Miyerkules bangud sa lapnagon nga pagbaha.
Kalakip sa basic goods nga ginabantayan sang DTI amo ang tinapay, canned fish kag iban pa nga marine products, potable water kag containers, processed milk, locally manufactured instant noodles, kape, asin, laundry soap, detergent, kag kandila.
Suno kay Pascual, ang mga magalapas sa layi, kalakip ang mga dalahig sa profiteering kag hoarding sa tyempo sang state of calamity, ang magapangatubang sa nagakaigo nga disposisyon.
Ginaganyat naman sang ahensya ang mga consumer nga i-report ang anuman nga overpricing ukon paglapas sa DTI Consumer Care Hotline sa 1-384 ukon mag-email sa consumercare@dti.gov.ph.
