Posible nga magataas ang presyo sang bugas sa pungsod kag mahimo ini maglab-ot sa P60 tubtob P62 kada kilo pagsulod sang Setyembre, suno kay Agriculture Secretary Francis Tiu Laurel Jr.
Sa ginpatigayon nga hearing sang Senate Proactive Response and Oversight for Timely and Effective Crisis Strategy (PROTECT) Committee, ginpahayag ni Laurel nga ang ginapaabot nga pagtaas nagahalin sa pagmahal sang abono nga halos nagdoble na ang presyo halin sa P1,650 tubtob P3,000.
Ginpahayag niya, nga kun ang mga mangunguma magapadayon sa tradisyunal nga paggamit sang urea kag indi magbalhin sa alternatibo nga abono nga ginarekomenda sang Department of Agriculture (DA), mas magataas pa ang gasto sa produksyon kag mahimo ini magresulta sa mas mahal nga presyo sang bugas.
Samtang, ginatudlo sang DA nga ginahibalo na nila ang iban pa nga paagi agud mapunggan ang pagtaas sang presyo, kaupod diri ang “rice blend” kag “corn blend.” Ang rice blend amo ang paghiusa sang imported kag lokal nga bugas sa 70-30 ukon 60-40 nga proporsyon agud masustentuhan ang suplay kag mabuligan ang mga mangunguma.
Ang corn blend naman amu ang kombinasyon sang puti nga mais kag bugas sa 50-50 nga proporsyon bilang alternatibo nga pagkaon.
Padayon nga nagapangita ang gobyerno sang mga solusyon agud mapabilin nga abot-kaya ang presyo sang bugas bisan pa sa nagataas nga gasto sa produksyon.
