Good news para sa mga motorista! Liwat nga magapatuman sang rollback sa presyo sang produktong petrolyo buwas nga adlaw, Hulyo 8, 2025.
Ini na ang ikaduwa nga asud-asod nga buhin-presyo, suno sa oil industry sources.
May pagnubo sang P0.70 kada litro sa gasolina, samtang P0.10 kada litro sa diesel, kag P0.80 kada litro sa kerosene.
Epektibo ang rollback buwas nga adlaw, las 6:00 sang aga.
Apisar maayo ini nga balita, ginpahayag sang mga analyst nga wala gihapon nabawi ang kabug-usan nga pagtaas sa presyo sang mga produktong petrolyo nga ginpatuman sa una nga quarter sang tuig.
Suno sa oil industry sources, ginalauman nga ang rollback tuga sang paghalog sang tensyon sa Middle East, ginalauman nga dugang nga supply, kag pagkahangawa sa epekto sang trade policy sang Estados Unidos sa pangkalibutanon nga ekonomiya kag demand sa langis.
Sadtong nakaligad nga semana, nagnubo man ang presyo sang gasolina sang P1.40, diesel nagnubo sa P1.80, kag kerosene nga nagnubo sa P2.20.
Wala pa sang pahayag ang iban nga kompanya sang gatong angut sa ila nga mangin price adjustment subong nga semana.
