Magalaum ang mga motorista sang gamay nga pagnubo sa presyo sang gatong sa masunod nga semana matapos ang masobra isa ka bulan nga tayuyon nga pagsaka tuga sang kinagamo sa Middle East.
Base sa trading sa world market halin Abril 6 tubtob Abril 8, 2026, nagnubo ang diesel sang P7.00 kada litro, gasolina sang P3.00 kada litro, kag kerosene sang P5.00 kada litro.
Ini ang tuga sang duha ka semana nga ceasefire nga nahisugtan sang Estados Unidos sang Amerika kag Iran, nga nagtuga sang pagnubo sa Mean of Platts Singapore kag premiums.
Suno kay President Ferdinand “Bongbong” Marcos Jr., pagagamiton sang Pilipinas ang amo nga kahigayunan agud mapabaskog ang suplay sang gatong sa pungsod.
Padayon naman nga nakabantay ang mga eksperto bangud nga mahimo pa magbag-o ang presyo sang gatong depende sa hulag sang trading tubtob Abril 10.
