ROXAS CITY – Ginreklamo sa Commission on Audit Regional Office sang concern citizen nagikan sa banwa sang Jamindan ang nagalalapaw nga presyo sang mga heavy equipment nga plano pagabaklon sang Local Government Unit (LGU) sang Jamindan sa tion nga maka-loan sa banko.
Suno sa tagreklamo sobra kataas sang presyo sang mga equipment nga ginbutang sang LGU Jamindan kun ikumparar sa actual nga presyo sini.
Nahibaluan nga maga-utang ang munisipyo sang P69 milyon agud ibakal sang 2 ka 6 wheeler dump truck, 1 ka grader, pison, backhoe kag 1 ka 10 wheeler self loading truck.
Pahayag sang tagreklamo, kapareho na lamang sang tatlo ka equipment nga grader, excavator, kag pison nga yara sa P39,300,000 ang actuwal nga presyo sa supplier apang sa presyo sang LGU nagsobra ini sang P19 milyon.
Sa kabilugan nagalab ot sa P34,800,000 ang ginaalegar overpricing sa tanan nga equipment kung madayun ang pagprocure.
Ginaklaro sang tagreklamo nga kuntani bantayan ang munisipyo sa pagbakal sang nasambit nga equipment kag mabuligan nga mangin insakto ang pagagamitan sang pondo.
