Prime Minister sang Cambodia, natalana nga magbisita sa Pilipinas

Natalana nga magbisita si Cambodian Prime Minister H.E. Samdech Moha Borvor Thipadei Hun Manet sa Pilipinas.

Suno sa Presidential Communications Office (PCO) igapatigayon ang nasambit nga pagbisita sa palaabuton nga Pebrero 10 kag 11.

Magaangkon sila sang bilateral meeting ni Pangulong Ferdinand Marcos Jr sa Pebrero 11.

Pila sa ila pagatalakayon amu ang pagpabaskog sang pagbato sa transnational crimes, depensa, trade, turismo, regional kag multilateral cooperation.

Matandaan nga sumugod pa sadtong 2023 sang nangin Prime Minister si Hun nga siya ang nagbulos sa amay sini nga si Hun Sen.

Mahibaluan nga naglab-ot na sa masobra 7,000 nga mga Pilipino ang nagapuyo kag nagatrabaho sa Cambodia.