Ginpaidalom na sa Tropical Cyclone Wind Signal No.1 ang Probinsya sang Capiz bangud sa padayon nga pagpalapit sang Tropical Storm Basyang suno sa pinakaulihi nga bulletin sang PAGASA subong nga aga.
Mga alas 4 sang kaagahon, ginabulubanta nga yara sa 440 kilometers ang sentro sang bagyo sa sidlangan nga bahin sang Hinatuan, Surigao del Sur.
Ang bagyo Basyang ang may maximum sustained winds nga 65 kph kag pagmadlos tubtob 80kph, kag nagahulag pa west-southwest sa kadasigon nga 15 kph.
Ginbatak naman sa Tropical Cyclone Wind Signal No. 2 ang sa pila ka bahin sang Mindanao, lakip na ang Surigao del Norte kag Surigao del Sur, Agusan del Norte kag Agusan del Sur, Misamis Oriental, Camiguin, kag pila ka mga lugar sa Davao Oriental kag Bukidnon nga may dala nga Mabaskog nga hangin nga mahimo makatuga sang gamay tubtob kasarangan nga kahalitan.
Samtang, ang Tropical Cyclone Wind Signal No.1 ang ginapataas sa malapad nga lugar sang Visayas kag Mindanao, lakip na ang Iloilo, Capiz, Negros Occidental, Guimaras, Cebu, Bohol, Leyte, Samar, Aklan, Antique, kag iban pa nga mga probinsya. Ini nga mga lugar ang posible maka eksperyensya sang mabaskog nga hangin sa masunod nga 36 oras.
Ginapanugyanan man ang publiko, ilabi na ang mga yara sa coastal areas kag mabukid nga bahin nga magpabilin nga alerto kag magsunod sa mga advisories sang local government units, PAGASA kag magpamati sa Bombo Radyo samtang padayon nga ginamonitor ang hulag sang bagyo.
