ROXAS CITY, CAPIZ- Ginpasidunggan ang Capiz Provincial Government kag ang Provincial Tourism and Cultural Affairs Office (PTCAO) sa Gawad Balangaw Awards for Culture and the Arts sang Disyembre 18, nga ginpatigayon sang Department of Economy, Planning and Development (DepDev) Regional Office VI sa Iloilo City.
Sa interview sang Bombo Radyo kay Mr. Alfonsus Tesoro, Head sang Provincial Tourism and Cultural Affairs Office, iya ginpahayag nga ang nasambit nga pasidungog ang isa ka pagkilala sa isa ka organisasyon ukon Local Government Unit nga may malawig na nga kontribusyon sa kultura kag arte sa pungsod.
Suno kay Tesoro, ang probinsya sang Capiz, may yara na sang masobra duha ka dekada nga tayuyon nga nagapromote kag nagapasangkad sang culture and arts sa pungsod.
Ginkilala ang probinsya sang Capiz nga nagapanguna nga Local Government Unit sa bug-os nga western Visayas sa Heritage Reservation kag ginpasidunggan man siya sang Balangaw Culture and Arts Category para sa patag sang Cultural Management, Theater kag Culture in Governance bangud sa masobra na 27 ka tuig nga kontribusyon niya sa pagpasangkad kag pagpromote sang kultura kag arte sang Capiz.
Nahibaluan nga ang Gawad Balangaw amo ang isa sa pinakataas nga regional recognition sa Western Visayas para sa mga indibidwal kag organisasyon nga may outstanding contributions sa kultura kag arte. Ginapasidunggan sini ang liderato, serbisyo, kag talento nga nagapabakod sang identidad kag pride sang probinsya.
Ginpanginbulahan naman sang natungdan ang tanan nga mga pumuluyo, officials sang probinsya kag mga katapo sang ahensya sa amo nga pasidungog.
Interviewed by Bombo Sunnie Mae Constantino Batencila
