ROXAS CITY – Nagaeksperensya sang pagbaha ang 13 ka mga barangay gikan sa lima ka banwa epekto sang pag-ulan ulan nga dala sang nagligad nga Low pressure area nga nangin Bagyong Agaton.
Ini ang ginpahayag ni Mrs. Judy Grace C. Pelaez, pinuno sang Provincial Disaster Risk Reduction and Management Office (PDRRMO) sang ma-interview sang Bombo Radyo.
Suno kay Pelaez, nga base sa ila monitoring nga may pagbaha nga napagkit sa banwa sang Dumalag ini ang sa bahin sang Mait Bridge apang sa karun ang naghubas na.
Ginbaha man ang isa ka barangay sa banwa sang Maayon, ini ang sa Brgy. Fernandez kun sa diin gintaop sang tubig ang mga ulumhan kag not passable tubtob sa karun sa tanan nga sahi sang salakyan.
Sa banwa sang Sigma, may yara naman sang duwa ka barangay nga ginbaha ini ang Brgy. Bangon-bangon sa sitio Manaba nga indi maagyan sang tanan nga sahi sang salakyan kag ang sa Brgy. Dayhagon sa sitio Karwagan, Taulay, Alimbayod ang not passable man.
Samtang, sa banwa sang Panitan may yara man sang pila ka barangay ang ginbaha ini ang Brgy. Cadio, Ambilay, Balatucan kag Tingkupon nga lunsay mga rice fields.
Lima naman ka barangay ang nagaeksperensya sang pagbaha sa banwa sang Cuartero, ini ang sa Brgy. Bitoon Ilawod, Brgy. Angub, Brgy. Nagba sa sitio San Jose nga lunsay mga flooded rice fields samtang ang Brgy. Pob. Ilaya sa sitio San Agustin ang indi maagyan sang light vehicles.
Sa banwa sang Panay, may yara sang duwa ka barangay nga ginbaha ini ang Brgy. Agbalu sa sitio Malingin kag Brgy. Maghubilan proper lunsay rice field’s apang maagyan sang mga salakyan.
Ginpahayag ni Pelaez, nga kahapon nga adlaw nagpatigayon sila sang pre-disaster risk assessments kag emergency preparedness and response nga pagsinapol kaupod ang PDRRMC member, agencies kag ilabi na ang MDRRMOs kun sa diin gintalakay sang PAGASA ang tatlo nga ginabantayan nga weather disturbance.
Ini ang Inter Tropical Convergence Zone (ITZC), Tropical depression Agaton kag may yara pa gid sa guwa sang Philippine Area of Responsibility (PAR) nga may international name nga ‘Malakas’ kag kun magsulod sa PAR ini ang pagatawgon nga Typhoon ‘Basyang’.
