Nagpirma ang Department of Agriculture-National Fisheries Research and Development Institute (DA-NFRDI), ang DA-Bureau of Fisheries and Aquatic Resources (BFAR), kag ang Department of Science and Technology-Metals Industry Research and Development Center (DOST MIRDC) sa isa ka tripartite memorandum of agreement (MOA) nga nagatuyo nga pabakuron ang lokal nga produksyon sang bangrus.
Sa idalom sang kasunduan, ang nasambit nga mga ahensiya ang magapatuman sang ginatawag nga “hatch project” nga ang buot hambalon amo ang “Heat-Assisted Temperature Control and Monitoring System “ para sa hatchery management sang bangrus.
Suno kay Hatch Project leader Glen Espena, ang tuyo sang proyekto ang paggamit sang “cost-effective kag reliable heating system” nga nakadisenyo agud mapabilin ang init ukon optimal water temperatures sa broodstock tanks sa tion sang taglamig.
Ang pagperma sa MOA sang tatlo ka ahensiya sang gobyerno ang ginhiwat sa Titanium Auditorium sa Bicutan, Taguig City.
Suno naman kay NFRDI Executive Director Lilian Garcia, importante ang nasambit nga proyekto nga magagamit sang bag-o nga teknolohiya sa fish production.
Ginabulubanta nga magadangat sa P5 million ang budget halin sa DOST-Grants-In-Aid para sa amo nga proyekto. Ini naman ang pagasuguran nga ipatuman sa BFAR – National Fisheries Development Center sa Dagupan City sa sulod sang 18 ka bulan kag magatakup sa Hunyo 30, 2025.
Ginalauman naman ni Garcia nga mabenepisyuhan ang proyekto aquaculture nga industriya sang pungsod kag mga kaanggid nga industriya kasubong sang metals, engineering, kag aquaculture.
