ROXAS CITY – Wala sa gihapon naga sink-in sa paminrason ni Atty. Joey Balatayo nga nakapasar ini sa 2023 Bar Examinations.
Sa interview sang Bombo Radyo kay Atty. Balatayo, iya ginpahayag nga daw kaangay yara pa siya sa cloud 9.
Suno kay Balatayo, tuman ang iya kahadlok kag kakulba gani wala ini nangisog nga tan-awon online kun nakapasar ayhan ini sa bar exam.
Antes pa man ipaguwa sang Supreme Court ang resulta, nagpadulong na ini sa Immaculate Conception Metropolitan Cathedral agud maghalad sang pangamuyo kag itugyan sa Makaako ang mangin resulta sang examination.
Gani, tuman ang pagpasalamat ni Balatayo sang nakabaton sang tawag nga pasado ini kag isa na ka abogado.
Aminado ini nga mabudlay ang proseso agud mangin isa ka lawyer sa diin kinahanglan magsakripisyo sang oras kag tulog agud makatuon lang ilabi na nga isa ini ka professor sa Capiz State University- Main Campus sa sulod sang 15 katuig.
Suno diri, mabudlay ang nagatrabaho sa adlaw kag naga-eskwela sa gab-i apang bangud sa madugay na niya nga handum ang mangin abogado wala nangin upang ang kakulangon sa oras agud malab-ot niya ini.
Thankful man ini sa CAPSU, abyan kag pamilya nga nagsuporta kag nagpati sa iya nga malumpawasan sini ang pagtilaw kag malab-ot ang handum.
Mahibaluan, naggradwar si Balatayo sa Colegio de la Purisima Concepcion College of Law sang June 2023.
Sa karon, wala pa sang plano si Balatayo nga i-practice ang iya propesyon bangud subong luyag sa gihapon niya ang magtudlo.
