Programa sang Bombo Radyo Roxas, ginkilala sang lokal nga gobyerno sang Roxas City
ROXAS CITY – Ginkilala sang gobyerno sang syudad ang isa ka segment sa programa sang Bombo Radyo Roxas nga Bombo Patrol 101 sa Barangay.
Sa ginpadala nga sulat sang Roxas City government nga ginlagdaan ni Mayor Angel Alan Celino, nagapasalamat ini sa Bombo Radyo Roxas, bangud sa daku nga bulig sang nasambit nga segment para mangin aware ang mga Capizeño sa nagakahinabo sa ila palibot kag matudluan sang ensakto nga paghaboy sang basura ukon proper waste disposal.
Nagapati man ang gobyerno sang syudad nga magaserbe nga maayo nga ehemplo ang segment nga ini sang Bombo Radyo Roxas para mas maganyat ang publiko nga ipabilin nga matinlo ang palibot agud malikawan ang mga balatian.
Nahibaluan nga una nga ginlunsyar ang Bombo Patrol 101 sa Barangay sa programa nga Bombohanay Bigtime, sa diin ang regular anchor diri amo ang station manager sang Bombo Radyo Roxas nga si Bombo JM Estorninos.
