Nagapanawagan ang People’s Coalition for Good Governance nga magtukod ang gobyerno sang National Crisis Committee sa tunga sang nagapadayon nga kinagamo sa Middle East.
Sa interview sang Bombo Radyo kay Mr. Wennie Sancho, convenor sang People’s Coalition for Good Governance, iya ginpahayag nga kinahanglan ang nasambit nga Committee bangud ang mga emerhensya kaangay sang giyera ang indi mapaktan kun san-o matapos rason nga may daku nga epekto sa supply kag presyo sang pila ka mga balaklon sa pungsod kaangay sang pagkaon kag gatong.
Suno kay Sancho, ang pagtukod sang National Crisis Committee nga magakoordinar sang tikang sang national kag lokal nga gobyerno lakip na ang pagpalig-on sang National kag Local Price Monitoring Councils agud bantayan ang presyo sang pagkaon kag enerhiya.
Pahayag pa niya, ang mga yara sa vulnerable nga sektor amo ang una nga maapektuhan sang pagtaas sang presyo sang mga balaklon kag mas makahatag sang mas mabug-at nga problema sa ekonomiya.
Nagapanawagan man natungdan sa publiko nga indi maghipos kag isinggit ang ila nga tingog kag magpadayon sa pagpanawagan sang aksyon gikan sa gobyerno agud maprotektahan ang kaayuhan sang pumuluyo para sa palaabuton
