Nagpasalig ang Bayan Panay nga mas madamu pa nga hublag-protesta ang patigayunon kag indi lang lunsay public hearing agud nga may manabat kag mapreso bangud sa kurapsyon.
Sa interview sang Bombo Radyo kay Elmer Forro, ang Secretary General sang Bayan Panay, iya ginpahayag nga nangin madinalag-on ang Trillion Peso March sa bug-os nga Pilipinas nga gin-updan sang nagkalain-lain nga mga indibidwal kaangay sang mga pari, madre, doctor, abogado, manunudlo, kag estudyante.
Suno kay Forro, iya nakit-an nga napukaw ang consciousness sang mga Pilipino sa nasambit nga lihok agud isinggit ang ila nga hibubun-ot kag kaakig nahanungod sa isyu sang kurapsyon kag ang tanan nag-ugyon sa malinong kag matawhay nga pagmartsa .
Nagpanawagan ang natungdan sa publiko nga dapat sa masunod nga eleksyon mangin bukas ang paminsaron sa pagpili sang nagakaangay nga lider nga indi kurap kag may kabalaka sa mga Pilipino.
