Roxas City – Ginka-akig ni Provincial Administrator Edwin Monares ang pagpakamalaut sang mga netizens sa pagtukod sang task force sa 50th Golden Thanksgiving Celebration sang gobyerno-probinsiyal nga gintuon mismo sa ika-50 anyos nga kaadlawan ni Capiz Governor Esteban Evan ‘Nonoy’ Contreras sa Nobyembre 6, 2019.
Suno kay Monares nga dapat lamang nga hatagan sang selebrasyon si Contreras bilang amay sang probinsiya.
Ginklaro man ni Monares nga indi ini basta lamang selebrasyon sang kaadlawan sang gobernador bangud magatambong sa nasambit nga kahiwatan si Senador Christopher ‘Bong’ Go kag imbitado man si Davao City Mayor Inday Sara Duterte.
Apang indi pa mapat-od sang administrador kun magaabot ang nasambit nga alkalde.
Nahibaluan sa nasambit nga kahiwatan magapatigayon sang State of the Province Address (SOPA) ukon 100 days nga mga nahimuan sang iya administrasyon sa pagpungko sa pwesto.
Ginpaathag man sini nga gintukod ang task force para mag-organize kag makaangkon sang kooperasyon ang mga department heads agud mangin matawhay ang pagsulundan sa adlaw sang kahiwatan.
Mahibaluan nga ginmandu ni provincial administrator Monares ang pagtukod sang task force para sa nasambit nga selebrasyon.
Sandig sa Memorandum Order No. 167–2019, ginhatagan sang direktiba ang magkatuhay nga departamento sa gobyerno-probinsiyal agud makadihon sang mga programa para sa kaadlawan sang gobernador nga pagapangunahan sang Provincial Tourism and Cultural Affairs Office (PTCAO).
Ginalauman man nga magatambong ang tanan nga mga alkalde kag mga punong barangay sa bilog nga probinsiya sang Capiz.
