Ginkumpirma ni Provincial Administrator Dr. Chinel Monares nga yara na sa critical level ang Roxas Memorial Provincial Hospital (RMPH) matapos nga nagsobra na sa 50 bed capacity ang mga COVID-19 patients.
Suno kay Monares nga nagataas ang kaso sang COVID-19 sa probinsiya sang Capiz rason nga kinahanglan na ini nga maaktuhan.
Ginakabig ang RMPH nga referral hospital sang COVID-19 patients sa probinsiya sa diin ang gina-cater lamang diri ang severe kag critical cases.
Maswerte naman nga nadugangan ang bed capacity sa gina-cater nga pasyente matapos ginbuksan ang isa ka area sa amo nga ospital.
Bangud sa padayon nga pagtaas sang COVID-19 cases kinahanglan nga magpreparar ang barangay ukon banwa sang facilidad sa ila lugar nga maga-cater sang mild and asymptomatic COVID-19 patients.
Ini bangud ang gina-admit nga mga COVID-19 patients sa RMPH ang critical kag severe cases.
Samtang ginkumpirma ni Monares ang reklamo sang mga pribado nga ospital sa kapaslawan sang Philhealth nga mabayaran sila sa ila claims.
Ginpahayag nga masobra sa tatlo ka bulan nga wala ginbayaran sang PhilHealth ang claims sang mga pribado nga ospital nga naga-agunto na bangud apektado ang ila operasyon.
Bilang pauna nga aksyon ginpalab-ot na sang gobyerno probinsiyal sa national government ang concern sang mga private hospitals agud gilayon nga masolusyunan ang isyu.
