ROXAS CITY -Ginrefer sa duha ka mga komitiba sa Sangguniang Panlalawigan ang ginpalab-ot nga verbal complaint sang pila ka mga investors nga nagsalig sang ila hard earned money sa pila ka mga investment scheme sa probinsiya.
Ginpahayag ni Vice Governor Jaime ‘’Mitang’’ Magbanua nga kasunod sa pagpabor sang mga board members sa nangin kaundan sang diskurso pribilihiyo ni Board Member Ricky Martin angut sa intervention nga ginahinyo sang mga na-biktima sa provincial board ang pagrefer sini sa Committee on Laws kag Committee on Economic Affairs agud mahatagan sang legislative action ang nasambit nga isyu pananglitan nga mapaslawan ang natungdan nga mga kompaniya nga mabalik ang ginsalig sa ila nga kuwarta sang mga investors.
Nakig-angut naman sila sa mga economic managers kag ginatingwaan nga malab-ot ang pila ka mga indibidwal nga makahatag sang sabat sa mga reklamo sang mga investors.
Ginapalab-ot man sini sa natungdan nga mga kumpaniya nga kuntani ila na ibalik ang mga investments sang mga investors bangud kadam-an diri ang makabig nga hard earned money nga gintaya lamang nila sa paglaum nga ini ang madugangan.
Aminado man si Magbanua nga pila sa mga staff kag himata sini ang nag-invest sa mga ginareklamo karon nga investment scheme kag natigayon lamang sini mahibaluan sang nagpalab-ot na sila sang ila pagkadismaya sa nadangatan sang ila investment.
Samtang nagpanugyan man ini sa publiko nga antes magbuhi sang ila nga kuwarta, siguraduhon nga legal ang operasyon sang nasambit nga kumpaniya.
