ROXAS CITY – Ginplastar ni Provincial Budget Officer Antonio Arbis ang duha ka mga options sa legislative kag executive department sang provincial capitol matapos nga wala pa na-aprubahan ang Annual Investment Plan (AIP) 2020.
Suno kay Arbis ang nasambit nga duha ka mga options amo ang magre-convene ang Provincial Development Council (PDC) agud ma-revalidate ang mga proyekto nga ginakwestyun sang Sangguniang Panlalawigan ukon mangita ang PDC sang iban nga proyekto nga mahimo nga tal-os sa mga proyekto nga nakita-an sang problema sang Sangguniang Panlalawigan.
Apang kinahanglan nga ma-aprubahan sang Sangguniang Panlalawigan ang 20% sang development fund sa diin igabuhin lamang diri ang siyam ka mga proyekto nga may yara sang problema kag wala na sang ipatuman nga mga proyekto.
Ginpahayag ni Arbis nga wala man sang problema nga liwat magpatigayon sang Provincial Development Council meeting agud talakayon ang mga proyekto.
Sa karon ginatugyan na lamang ni Arbis sa executive kag legislative department ang nasambit nga isyu bangud sa karon wala pa nakahinun-anon ang duha ka mga departamento.
Nahibaluan nga ang ginagamit nga pondo sa karon sang provincial government amo ang re-enacted budget nga para sa sweldo sang mga empleyado, mga kinahanglanon sang kada departamento, pagbakal sang mga bulong sa ospitals, pagkaon sang Capiz Rehabilitation Center (CRC) kag iban pa.
Samtang, ginklaro naman ni Arbis nga mahimu lamang ipatuman ang mga proyekto kun may yara na sang gin-alokar nga pondo ang gobyerno.
