CAPIZ – Nagpanagtag sang alcohol breathalyzers ang Provincial Government sang Capiz sa mga public hospital sang probinsya.
Sa interview sang Bombo Radyo kay Dr. Cesar Yap Jr, Chairman sang Committee on Health, iya gin pahayag nga nasambit nga pagpanagtag ang ginpangunahan ni Capiz Governor Fredenil Castro kaupod ang Capiz Provincial Health Office sa Roxas Memorial Provincial Hospital kag sa apat ka municipal district hospitals.
Suno kay Yap, ini ang may tinutuyo nga ma-determinar ang isa ka indibidwal kun yara sa impluwensya sang makahulubog nga ilimnon.
Ang nasambit nga device ang naga-gana pamaagi sang paghuyop sa ‘mouthpiece’ sini kag kun maglab-ot sa 0.05% ang alcohol level, makabig na nga ‘legally drunk’ ang amo nga indibidwal.
Pahayag pa niya, una nga ginpanagtagan ang mga ospital bangud madamu sang mga aksidente sa dalanon ang tuga sang driver nga yara sa impluwensya sang makahulubog nga ilimnon.
Nahibaluan nga sang bulan sang Enero tubtob Mayo sang tuig 2025, nakabalhag sang kapin 600 ka mga aksidente sa dalanon nga involved ang mga nasambit nga indibidwal.
Nagpanawagan man ang natungdan sa publiko nga mangin responsable sa pag-inom agud mapahagan-hagan ukon malikawan na ang pagluntad sang mga kaangay nga insidente.
INTERVIEWED BY: BOMBO ROADNIE DABAN DALANON
