ROXAS CITY – Wala sang poder ang gobyerno probinysal sa pagdesisyon nga ipauntat ang pagbaton sang mga Locally Stranded Individuals ukon LSI’s sa probinsya sang Capiz.
Ini ang ginpaathag ni Department of the Interior and Local Government (DILG) Provincial Director John Ace Azarcon sa ginpatigayon nga sinapol kaupod ang Provincial Inter-Agency Task Force (IATF) kag gobyerno probinsyal pinaagi sa isa ka zoom meeting.
Suno kay Azarcon nga indi mahimo makadesisyon si Gov. Esteban Nonoy Contreras kun pauntaton ang pagbaton sang mga LSI’s nga magapauli sa probinsya magluwas na lamang kun may yara sang nagakaigo nga rason ang pagpauli sang mga ini.
Mahibaluan nga namangkot si Provincial Administrator Edwin Chinel Monares kay Azarcon angut diri kun may yara sang poder ang gobernador sa pagpauntat sa mga magapauli sa probinsya.
Ini bangud ang mga Local Chief Executives ang magahinyo kun pauntaton na ang pagpapuli sa mga LSI’s kun sa diin ang gobyerno probinsyal magapakig-angut sa Regional IATF ukon National IATF.
Dugang pa sini nga kun ang mga barangay officials naman ang maghinyo sa isa ka LGU nga indi na magbaton sang LSI’s, kinahanglan nga hinalaan ini anay sa lebel sang higher LGU antes ipalab-ot ang problema sa gobernador.
Dugang pa sini nga kinahanglan man ang assessment sang Department of Health kun sa diin makasarang ang LGU sa pagbaton sa magapauli nga mga LSI’s sa ila lugar.// Samtang, pagatsekyaron anay sang ahensya ang tagsa ka mga quarantine facilities kag hospital kun sarang pa ang mga ini makabaton sang mga LSI’s sa probinsya.
