ROXAS CITY – “INDI GANI KABALO MAGGAMIT KAG MAGHAWID SANG CELLPHONE KAG COMPUTER, NAG-ADMINISTRATIVE OFFICER PA”
Ini ang matigdas nga sabat ni Provincial Warden Arjuna Yngcong sang mainterview sang Bombo Radyo.
Ini may kaangtanan sa mga alegasyon sa iya ni Administrative Officer Andreo Llaver matapos nga ginpasa sini ang pila ka mga dokumento kay Provincial Administrator Edwin Chinel Monares natuhoy sa anomalya nga nagakahinabo sa Capiz Rehabilitation Center.
Ginpanginwala ni Yngcong ang mga alegasyon sa iya ni Llaver nga nagapanukot ini sa mga inmates sa tagsa ka maggamit ukon magtawag sang cellphone, pagpanukot sa mga inmates sang inugtughong nga gasolina, indi pagpadala sang mga inmates sa Bilibid Prison sa Muntinlupa City kag paghatag sang special treatment sa mga kilala sini nga mga inmates.
Ginpahayag sini nga sa iya 34 katuig na nga pagserbisyo sa provincial government kag 13 katuig nga pagserbisyo sa CRC wala gid ini sang may ginhimo nga indi insakto sa iya nga trabaho.
Suno kay Yngcong nga may yara sang nagahingabot sa iya nga posisyon kag luyag nga mapahalin ini sa serbisyo sa nasambit nga pasilidad.
Ginklaro man sini nga wala sang kamatuoran ang tanan nga mga alegasyon sa iya ni Llaver bangud may yara sang cellphone ang CRC nga ginagamit sang mga preso apang wala ini nalakip sa budget nila rason nga kinahanglan ini paloadan sang mga inmates.
Dugang pa sini nga wala man ini nagapanukot sang gasolina sa mga inmates kabaliskaran sa akusasyon sa iya ni Llaver.
Magluwas diri, indi man matuod suno kay Yngcong ang alegasyon nga ginahatag sini sang special treatment ang mga kilala sini nga mga inmates kag indi pagpadala gilayon sa Bilibid Prison sa Munitinlupa City.
Gin-athag ni Yngcong nga wala pa sang COVID-19 Pandemic nakahimo kag ginproseso na sini ang mga dokumento kag travel order sang mga inmates nga igapadala sa amo nga bilibid.
Dugang pa sini nga indi man mahimo nga pinsan ipadala ang mga inmates rason nga 10 lamang ka-indibidwal tagsa ka trip.
Samtang, ginbuyagyag naman ni Yngcong ang indi ensakto nga nagakahinabo sa nasambit nga pasilidad kapareho na lamang sang pagpagamit sang mga guards sang ila mga cellphone sa mga inmates nga may yara sang kaso nga may kaangtanan sa droga.
Samtang, nagpanindugan naman si Yngcong nga handa sini atubangon ang tanan nga mga alegasyon nga ginahaboy sa iya ni Llaver bangud nagapati siya nga wala man ini sang kamatuoran kag ginahingabot lamang sini ang iya nga posisyon.
