Nagpaandam ang isa ka public health expert sa posible epekto sa lawas sang sobra nga init sang adlaw.
Ini kasunod sang nagataas nga heat index nga naeksperyensyahan sa pila ka lugar sa Western Visayas.
Sa interview sang Bombo Radyo kay Dr. Philip Ian Padilla, Professor sang University of the Philippines Visayas, iya ginpahayag nga ang direkta nga pagbulad sa init sang adlaw may yara sang malain nga mga epekto pareho sang:
Heat cramps – nga tuga sang pisikal nga aktibidad bangud sa direktang exposure sa init.
Heat exhaustion – nga ginabatyag bangod sang kakulang sang tubig sa lawas kag mahimo maglab-ot sa mas malala nga kondisyon nga heat stroke.
Suno kay Padilla, malikawan ang amo nga mga sakit paagi sa pag-inom sang walo ka baso sang tubig ukon mas sobra pa kada adlaw.
Dugang pa niya, nagakadapat magsuksok sang light-colored nga panapton.
Nagpahanumdom man ini sa publiko nga kon may mabatyagan nga pagpalanakit sa lawas, kinahanglan gilayon nga magpakonsulta sa doktor.
