Magapangatubang sa kaso nga paglapas sa RA 11926 ukon Indiscriminate Discharge of Firearms ang isa ka miyembro sang Philippine National Police matapos ginpahayag nga nagpalupok sang armas luthang sa haya sang iya amay sa Sitio Palagtingan, Barangay Agambulong, Jamindan, Capiz.
Ang suspek ang may rangko nga isa ka patrolman nga naka-assign sa Iloilo City Police Mobile Force Company.
Sa interview sang Bombo Radyo kay Police Major Rachelle Garnica, spokesperson sang Capiz Police Provincial Office, iya ginpahayag nga base sa imbestigasyon sang Jamindan Municipal Police Station, nagluntad ang komosyon sa tunga sang suspek kag sang iya magulang rason nga nag pagpalupok ini sang armas luthang.
Suno kay Garnica, bangud sa insidente, tatlo ka mga indibidwal ang napilasan kag gilayon nga gindala sa ospital para sa nagakaigo nga pagbulong.
Sa subong, nagapabilin sa kustodiya sang Jamindan PNP ang suspek para sa nagakaigo nga disposisyon kag pagproseso sang kaso.
