ROXAS CITY –Ginapadalman sa karon sang kapulisan kun sin-o ang yara sa likod sa naglapta nga bomb threat sa City Health Office kaina sang aga.
Ba-se sa pagpangusisa sang Bombo Radyo nga nakabaton sang text message gikan sa wala mahibaluan nga texter ang Provincial Disaster Risk Reduction and Management Office nga may gintanum nga bomba sa City Health Office.
Gilayon nga nagpakig-angut ang PDRRMO head nga si Mrs. Judy Grace Pelaez sa Roxas City PNP agud maaksyunan ang nabaton nga mensahe gikan sa wala makilala nga texter.
Nagpadulong sa lugar ang Philippine Coastguard dala ang mga canine dogs, Roxas City PNP, Bureau of Fire Protection kag iban pa nga response unit para maghatag seguridad kag magtsekyar sa sulod kag palibot sang CHO.
Gintsekyar man ang mga salakyan nga yara sa bisinidad sang CHO agud masiguro nga hilway ini sa ginaalegar bomba.
Samtang ginapatigayon ang inspeksyon sa CHO, temporaryo nga gin-evacuate ang mga pasyente nga magapa-check-up sa City Health kag ginpabalik lamang sang masiguro nga wala sang bomba sa amo nga facilidad.
Suno kay Police Lt. Col. Dante Tayco, nga pila ka mga anggulo sa karon ang ginatan-aw nga posible rason sang pagpamahog kalakip ang pagpang-sabotahe ukon may kalain sang buot sa CHO nga luyag lamang magtimalos ang yara sa likod sini
Samtang matapos nga masiguro nga clear ang area ginpabalik man ang mga pasyente kag nagbalik sa normal ang operasyon sa CHO.
