ROXAS CITY – Partially burned ang isa ka puluy-an sa Sitio Tacas, Barangay Aglibacao, Jamindan Capiz, matapos ini nga masunog.
Ang nasambit nga puluy-an ang ginapanag-iyahan ni Ricky Venas 33-anyos kag isa ka laborer.
Nagluntad ang amu nga sunog 10:14 sang gab-i kag gindeklarar nga fire out 10:35.
Mahibaluan nga wala sang tawo ang amu nga puluy-an sang natabo ang sunog kag nadiparahan na lamang sang kaiping sini nga nagadaba-daba na ang kusina.
Dugang pa sini nga human sa light materials ang puluy-an rason nga madasig ginlamon sang kalayo.
Naglab-ot naman sa kapin P9,000.00 ang ginbilin nga halit sang amu nga sunog.
Sa karun padayon pa ang imbestigasyon sang Bureau of Fire Protection (BFP) Jamindan agud mahibaluan kun anu ang gintunaan sang nasambit nga insidente.
