ROXAS CITY, CAPIZ- Totally burned ang isa ka balay matapos nga ginlamon sang kalayo kagab-I, Nobyembre 25, 2025 sa Urban, San Juan Barangay Baybay, Roxas City.
Ang amo nga puluy-an ang ginapanag-iyahan ni Reynald Mina, 26-anyos.
Sa impormasyon nga nakuha sang Bombo Radyo nagikan sa Bureau of Fire Roxas City, ginpahayag nga nakabaton sila sang tawag nagikan sa isa ka residente sa diin nga gilayon ini nila nga ginpadulungan.
Dugang pa diri, sa ila nga pag-abot, wala na sang kalayo bangud sa pagbinuligay man sang pagpangbasya sang mga pumuluyo sa amo nga balay.
Nahibaluan nga human sa light materials ang nasunog nga puluy-an.
Maswerte naman nga wala na sang iban pa nga napilasan sang tion nga natabo ang amo nga sunog magluwas sa tag-iya sang balay nga natunok sang lansang samtang nagabulig sa pagpalong sang kalayo.
Sa subong, nagapadayon ang imbestigasyon sang mga katapo sang bombero agud nga matumod ang gintunaan sang amo nga sunog.
Reported by Bombo Jessa Mae Siman De Los Santos
