ROXAS CITY -Nagdepensa ang punong barangay sang Barangay Ibaca, President Roxas Capiz kasunod sang ginaalegar reklamo nga pagpamahog sang isa ka senior citizen sa nasambit nga banwa.
Gin-ako ni punong barangay Jerson Bonayon nga nagpadulong ini sa panimalay ni ginang Leonisa Legaspira agud komprontahon ini nga kakason ang ginpost sang bata sini sa facebook angut sa distribusyon sang Social Amelioration Program (SAP).
Apang ginpanginwala ni Bonayon nga ginpahog sini nga patyon ang nasambit nga tigulang kabalikaran sa alegasyon sang tagareklamo.
Suno kay Bonayon nga ginlista sini ang ngalan ni Legaspira sa mga makabaton sang bulig pinansyal apang pag-abot sa validation sang Municipal Social Welfare and Development Office (MSWDO) sang banwa, ginkakas ini matapos natukiban nga ang bana ni Legaspira ang isa ka SSS pensioner.
Ginalikawan sini nga makita sang iyang mga kabataan ang post sang anak ni Legaspira kag magbinaslanay sa post.
Samtang ginkompimar man ni Bonayon nga ginhusay ang magtimbang nga grupo matapos nga ginpatawag sang mga kapulisan sa banwa sang President Roxas.
