CAPIZ- Ginlunsyar na sang Department of Health (DOH) ang PuroKalusugan Program sa probinsya sang Capiz bilang kabahin sang kampanya para sa mas epektibo kag lapnagon nga pagdul-ong sang primary healthcare services, ilabi na sa mga barangay nga unserved kag underserved.
Sa interview sang Bombo Radyo kay Mr. Joeffrey Espiritu, Public Information Officer sang DOH-Capiz, ginpahayag nga ang PuroKalusugan amo ang flagship program sang ahensya kag isa sa mga prioridad ni DOH Secretary Teodoro Herbosa. Ginamanduan ini sang Department Memorandum No. 2025-0024, nga nagahatag sang giya sa implementasyon sang programa.
Dugang pa ni Espiritu nga ang programa isa ka konkreto nga aksyon sa idalom sang Universal Healthcare Act, agud nga ang tagsa ka Pilipino, bisan pa sa pinakamalayo nga purok, makaagom sang serbisyo-medikal nga libre kag accessible.
Pamaagi sa PuroKalusugan, ginadul-ong ang mga serbisyo-medikal direkta sa mga komunidad—pinaagi sa mga barangay health center, mga barangay gym, kag purok visitation sang mga health personnel. Sa karon, may 133 ka DOH-deployed personnel sa Capiz, lakip na ang mga doctor to the barrio, nurses, midwives, pharmacists, nutritionists, kag medtechs, nga mangin kabahin sang PuroKalusugan Teams.
Ini nga inisyatibo ginahiwat sa koordinasyon sang Provincial Health Office kag mga Local Health Offices.
Sa pilot implementation sini, 51 lang anay ka mga barangay sa probinsya sang Capiz ang maka-avail sang serbisyo, halin sa kabug-usan nga 473 ka barangay kag target nga masakop tanan tubtob 2028.
Nahibaluan nga pagatutukan sang programa ang walo ka health priority areas nga ginakalakipan sang Immunization, Nutrition, Maternal Health, Water Sanitation and Hygiene (WASH), Tuberculosis & HIV, Road Safety, Non-Communicable Diseases (NCDs) pareho sang hypertension kag diabetes, kag Cancer Prevention and Control upod na ang Hepatitis-B management.
Ginsentro man ni Espiritu ang importansya sang Prevention and Control of Notifiable/Communicable Diseases, nga ginapahanumdom nga kinahanglan gilayon nga i-report sa DOH ang mga kaso sang balatian para sa madinalag-on nga containment kag response.
Ang PuroKalusugan isa ka kabahin sang agenda nga “Bawat Pilipino, Ramdam ang Kalusugan” kag nagapakita sang padayon nga panikasog sang gobyerno sa paghatag sang libre kag inklusibo nga healthcare sa tanan.
Interviewed by Bombo Francis Biñas
