Gin-aresto sang Quezon City Police District (QCPD) si Police Senior Master Sergeant John Mollenido, bana ni Police Senior Master Sergeant Diane Marie Mollenido, nga nasapwan nga patay sa Bulacan, kag amay sang bata nga si John Ysmael nga nasapwan man nga patay sa Tarlac.
Madumduman nga antes sila ginpatay, nagasakay ang mag-iloy sa ila salakyan agud kuntani ibaligya, apang nagresulta sang ila kamatayon kag pagkawat sang salakyan.
Gina-alegar nga ginbaligya sang mga suspek ang salakyan sa isa ka buyer sa balor nga P450,000.
Ang salakyan narecover sang Regional Highway Patrol Unit–Cordillera Administrative Region sa Baguio City kahapon, Enero 31, 2026.
Nahibaluan nga una na nga ginakabig sang mga otoridad si PSMS John Mollenido bilang isa sa mga persons of interest sa krimen.
