ROXAS CITY – Ginpahayag sang Civil Service Commission (CSC) Capiz nga mahimo lamang maka-file sang protest letter ang isa ka kwalipikado nga empleyado batuk sa indi kwalipikado nga appointed employee.
Ini ang sandig sa “2017 Rules on Administrative cases in the Civil Service section rule 18 section 89 on whom to file protest” nga ginpahayag ni Dir. Rufino Leonoras, sang mainterview sang Bombo Radyo.
Klaro suno diri nga kun qualified ang isa ka appointee, indi ma-entertain ang nasambit nga protest letter.
Apang, kun indi kwalipikado ang isa ka appointee, kag ang nagprotesta nga empleyado ang qualified, may tyansa nga ma-disqualify ang appointment sang empleyado.
Sa karon, indi pa masiling sang CSC kun kwalipikado ukon indi ang gin-appoint nga coordinator sang Provincial Planning Development Office nga si Wilmar Delos Santos.
Matandaan nga may kaangtanan ini sa ginpalab-ot nga protest letter sa amu nga talatapan ni Salim Biclar, Planning Development Officer IV, nga nagpahayag nga indi ini kumporme sa appointment ni Delos Santos, bangud para sa iya nga siya ang kwalipikado sa amu nga posisyon.
