ROXAS CITY – Ginareklamo sang mga residente sang Sitio Sto. Rosario, Barangay Lonoy, Roxas City ang quarry operation nga ginapatigayon sa lugar bangud ginatunaan ini sang pagbaha kag paglaputyak sang dalan sa tagsa ka magbubo ang ulan, magluwas pa sa tuman nga gap-ud kun tag-ilinit.
Ginpahayag sang isa ka lola sa pagpangusisa sang Bombo Radyo nga sa bukid nagahalin ang tubig nga nagailig kag nagasulod sa ila balay
Aminado ini nga sadto nagataas gid man ang lebel sang tubig apang ang kinalain sa karon, nagasulod ini sa ila balay kag nagakabasa ang ila nga mga kagamitan./
Suno pa sa lola nga nagahatag ini sang kahadluk sa iya, labi na nga nagaisahanon lamang ini sa balay.
Suportado naman sang isa ka concerned citizen ang nangin pahayag sang lola sa diin suno diri nga nagsugod ang huol nga natuga sang quarry operation sa mga residente kasunod sa pagbukas sang klase.
Ginpahayag sang isa ka concerned citizen nga masami ginatunaan sang pagbaha sa lugar ang bun-od nga nagapunong sa creek, gani wala na sang malutsan ang tubig.
Ginsuhestyon sang mga residente sa nagapatigayon sang quarry operation nga padakuan ang tamburong agud madasig ang pag-ilig sang tubig.
Nahibaluan nga lima ka mga panimalay nga apektado sang quarry operation sa nasambit nga lugar ang nagpalab-ot na sang ila reklamo sa mga opisyales sa barangay, apang wala sa gihapon sang aksyon.
