ROXAS CITY – May nakita nga bayolasyon ang Capiz Provincial Environment and Natural Resource Office (CAPENRO) sa operasyon sang quarry sa Barangay Parian, Sigma, Capiz.
Ini ang ginpahayag ni CAPENRO Head. Atty. Emilyn Depon sang mainterview sang Bombo Radyo.
Apang ginklaro ni Depon nga may yara sang governor’s permit ang nasambit nga quarry operation sandig sa Revised Revenue Code nga ginasunod sang talatapan.
Suno kay Depon nga sandig sa pagsulundan, barangay resolution lamang ang kinahanglan nga masumiter sang quarry operator nga pirmado sang mga barangay officials nga nahimo man sang tag-iya sang quarry operation sa amo nga lugar nga si Ramonito Laab.
Apang kasunod sang ginhimo nga imbestigasyon sang talatapan sa nasambit nga lugar bangud man sang reklamo sang mga pumuluyo, didto natukiban nga may yara sang nangin bayolasyon sa Environmental Compliance Certificate (ECC) ang nasambit nga quarry operation bangud wala ini sang siltation pond.
Bangud diri suno kay Depon, sadtong Oktubre 30, 2019, na-isyu sang cease and desist order ang talatapan batuk sa tag-iya sang quarry operation kun sa diin kinahanglan sini nga mag-comply sa ila bayolasyon.
Nobyembre 4 gintalana ang technical conference kun sa diin ginapareport ang tag-iya sang quarry operation apang napaslawan ini nga makatambong.
Angut diri, nagpangabay si Depon sa mga barangay officials nga pananglitan may yara sang nagaka-interes sa pag-operate sang quarry sa ila lugar, imbitahon ang ahensiya para sa public consultation agud mapahangop ang epekto sang quarry operation.
