Posible nga ipaidalum sa kustodiya sang US Marshals si Pastor Apollo Quiboloy kun aprubahan sang gobyerno sang Pilipinas ang extradition request sang Estados Unidos.
Ini ang ginpahayag ni Philippine Ambassador to the US Jose Manuel “Babe” Romualdez, matapos makumpirma nga nagpadala na ang US sang pormal nga request para sa extradition ni Quiboloy.
Suno kay Romualdez, kun maaprubahan ang extradition, magalupad pakadto sa Pilipinas ang US Marshals paagi sa ila kaugalingon nga eroplano agud kuhaon si Quiboloy.
Direkta ini nga dal-on sa Los Angeles, California, kun sa diin ginpasaka ang mga kaso batok sa iya.
Mahimo man nga mag-upod ang mga ahente sang Federal Bureau of Investigation ukon FBI sa operasyon.
Ginalakipan sang mga kaso ni Quiboloy sa Estados Unidos amo ang sex trafficking, human trafficking, bulk cash smuggling, fraud kag racketeering.
Ginpahayag ni Romualdez nga ang kaso ni Quiboloy isa ka importante nga internasyonal nga kaso bangud nalakip diri ang alegasyon sang human trafficking kag sex trafficking.
Sa subong, yara si Quiboloy sa Pasig City Jail bangud sa separado nga kaso nga qualified human trafficking kag abuse sa Pilipinas.
Samtang, ginapahayag sang kampo ni Quiboloy, paagi sa iya abogado nga si Atty. Israelito Torreon, nga indi dapat pagdalion ang extradition bangud sa nagapadayon pa ang mga kaso batok sa pastor sa lokal nga korte.
