Ginpakigbahin sang Bangko Sentral ng Pilipinas ang bag-o nga kasuguan batuk sa financial scamming.
Sa interview sang Bombo Radyo kay Atty. Joseph Edward Matias, Office of the General Counsel and Legal Services sang Bangko Sentral ng Pilipinas, iya ginpahayag nga ang RA 12010 ukon mas kilala bilang Anti-Financial Account Scamming Act, ginpirmahan sang gobyerno agud protektahan ang mga Pilipino batuk sa mga scam nga naga-gamit sang bank accounts kag e-wallets. Ang kasuguan nagadumili man sa paggamit sang mga account sa ilegal nga transaksyon, lakip na ang pagbaligya, pag-arkila, ukon paggamit sang mga account sa scams.
Isa sa mga nagapanguna nga katuyuan sang layi amo ang pagdumili sa money mules, mga tawo nga nagagamit sang ila account para magbalhin sang kwarta nga halin sa krimen. Ginadumilian man ang social engineering scams pareho sang phishing, vishing, smishing, kag online lover scams, nga naga-target sa mga biktima para makuha ang ila personal nga impormasyon.
Nahibaluan nga ang mga nagalapas sang kasuguan magaatubang sang mabug-at nga penalidad,lakip na ang pagkapreso kag multa. Kun ang scam organized, mahimo pa ini magresulta sa mga kaso nga maka-apekto sa ekonomiya. Ginahingyo man sang kasuguan nga magpatuman sang mga hugot nga seguridad ang mga bangko kag e-wallet providers para matukiban ang mga fraudulent activities.
Pahayag pa sang Bangko Sentral ng Pilipinas (BSP), kinahanglan magpatuman ang mga bangko sang One Time Pin/Password (OTP), biometrics, kag iban pa nga mga security features. Mahimo man i-freeze ang mga pondo sa account sa sulod sang 30 ka adlaw samtang nagapadayon ang imbestigasyon, kag kun mapamatud-an nga scam ini, ibalik ang kwarta sa biktima.
Pahanumdom naman ni Matias para sa mga ordinaryo nga Pilipino, nga importante gid nga indi pagpasugtan nga ang iban ang maggamit sang accountkagprotektahan ang OTP, PIN,kag password kag gilayon nga i-report ang bisan ano nga suspicious nga transaksyon sa bangko para malikawan ang pagkabiktima sang scam.
With a report from Bombo Jessa Mae De Los Santos
