Ginaduso subong sang Senado sa pagpanguna ni Senador Erwin Tulfo ang random on-site inspections sang mga proyekto sang gobyerno agud masiguro nga magamit sang husto ang pundo sang publiko kag indi mausik ang kwarta sang mga pumuluyo.
Ini may kaangtanan sa mga isyu nga nagtuhaw sa paggasto sang 2025 national budget. Kon sa diin nabuyagyag ang ginaalegar nga mga maanomaliya sa paggamit sang pundo, ilabi na ang pinakadaku nga flood control project scandal.
Sa subong, ginaduso ang pagtukod sang Joint Congressional Oversight Committee agud mabantayan ang pagpatuman sang mga programa kag proyekto sang gobyerno agud masiguro nga ini ang ginapatuman kag ang pondo gikan sa 2026 General Appropriations Act (GAA) ang magamit sang husto.
Madumduman nga bag-o lang ginpirmahan ni Presidente Ferdinand “bongbong” Marcos Jr. ang national budget law para sa tuig 2026, sa diin ang pila sa mga unprogrammed appropriations ang gin-veto sang presidente nga nagalab-ot sa P92.5 bilyon.
Gani, ginalauman nga may mataas nga kredibilidad ang mga mangin kabahin sang ginaduso nga komitiba agud masiguro nga ang mga report ukon impormasyon nga igapaguwa amo lamang ang kamatuoran, subong nga may yara sang mga katapo sang Kongreso nga ginpahayag nagsulod ukon nag-endorso sang pila ka mga proyekto nga nagapabor sa ila personal nga interes sa 2026 budget.
