Ginkadismaya sang mga tricycle drivers sa Roxas City ang liwat nga pagsaka sang presyo sang gatong.
Sa interview kay Joseph Trinidad Soberano, spokesperson sang Roxas City Tricycle Operators and Drivers Association, iya ginpahayag nga wala pa sila makabawi sa nagligad nga pagsaka sang presyo sang gatong apang liwat naman nga nagtimbuok.
Suno kay Soberano, dako gid ang epekto sini sa ila adlaw-adlaw nga kita bangud nagabuhin ini sa ila nga ginansya.
Dugang pa sini, naglab-ot sa halos duha ka piso ang ginpatuman nga pagsaka sang presyo sang gatong, nga dugang nga palas-anon sa ila nga gasto.
Bangud sini, ginapanawagan sang grupo nga suspendihon anay ang excise tax sa produktong petrolyo agud mabuligan ang mga driver nga nagaantos sa pagsaka sang presyo sang gatong.
