Gilayon nga nagpatawag sang sinapol ang Cagayan Valley Regional Disaster Risk Reduction and Management (DRRM) Council kasunod sang tsunami warning nga ginpagwa sang Philippine Institute of Volcanology and Seismology (Phivolcs).
Ang baybayon sang Batanes, Cagayan, kag Isabela ang pila sa mga lugar nga posible makaeksperyensya sang pagbalud nga nagalab-ot sa isa ka metro ang kataason bangud sang Magnitude 8.8 linog sa Russia.
Lakip man diri ang kaiping nga mga coastal provinces kasubong sang probinsya sang Aurora sa Rehiyon 3 kag Ilocos Norte sa Rehiyon 1.
Suno sa RDRRMC, gilayon ini nga nagpagwa sang abiso sa mga coastal communities nga magpalayo sa mga baybayon kag likawan ang marine activities.
Gina-evacuate man ang mga residente nga nagapuyo sa mga lugar nga malapit sa kadagatan para sa ila kaluwasan.
Nalakip sa sinapol sang konseho ang pagpadala sang mga tinawo sang Philippine Coast Guard (PCG) sa mga komunidad sa baybayon agud magpatigayon sang patrol operations kag magbantay sa mga pumuluyo.
Bisan pa nga ang paandam nga ginpaguwa sang Pacific Tsunami Warning Center nagasiling nga ang isa ka tsunami mahimo mabatyagan halin alas 1:20 sang hapon tubtob alas 2:40 sang hapon, wala gindula sang konseho ang posibilidad sang mataas nga balod nga magapadayon sa pila pa ka oras.
