ROXAS CITY – Ginpasakaan sang petition for disqualification sa Commission on Election si reelectionist Capiz Governor Antonio del Rosario kag Roxas City mayoralty candidate na si Mr. Ronnie Dadivas.
Base sa petisyon nga ginpasaka ni Partido Demokratiko Pilipino – Lakas ng Bayan (PDP-Laban) provincial chairman Mr. Essex Quintia, ginlapas nanday Del Rosario kag Dadivas sa ang Sections 66 at 261 sang Batas Pambansa Blg. 881 ukon Omnibus Election Code.
Suno kay Quintia, sadtong Oktubre 15, 2018 pa sang mag-file sang iya nga certificate of candidacy (COC) si Dadivas apang ginkuha pa ini ni Del Rosario bilang Community Affairs and Special Program Director for Gender and Development sang provincial government humalin Oktubre 16, 2018 tubtob Disyembre 31, 2018 nga may sweldo nga P40, 000 sa isa ka bulan.
Maathag suno kay Quintia nga ginlapas nanday Del Rosario kag Dadivas ang nasambit nga laye bangud dapat nga automatically resigned na si Dadivas sa provincial government kasunod sang iya pag-file sang COC.
Posible suno kay Quintia nga nagamit pa ni Dadivas ang nasambit nga posisyon sa iya nga kandidatura sa pagka-alkalde.
