Ginatun-an sang Philippine Sports Commission (PSC) ang posibilidad nga makatukod sang mga regional training centers sa nagkalain-lain nga bahin sang pungsod para sa mga Pilipino nga mas makatuon sa hampang nga tennis.
Sa plenary deliberation sang Kamara para sa proposed 2027 budget sang PSC, ginpamangkot ni Philreca Party-list Representative Presley De Jesus angut sa mga programa sang komisyon para sa mga pamatan-on nga luyag magsulod sa nasambit nga sport.
Ginaduso sang mamalidha ang bagay kasunod sang nagataas nga popularidad sang tennis sa pungsod bangud sa sunod-sunod nga kadalag-an sang Filipina tennis star nga si Alex Eala.
Ginhatagan pagtamod ni De Jesus nga nagapabilin nga hangkat para sa mga Pilipino ang pagsulod sa tennis bangud ginakabig pa ini nga bag-o kag pang-manggaranon kon ipaanggid sa basketball kag volleyball bangud sa mahal nga gasto sa kagamitan kag training.
Suno sa PSC, ang pagtukod sang mga regional training centers ang mangin taytay agud mapadali ang access sang mga pamatan-on sa mga rehiyon kag mapataas ang kalidad sang hampang sang mga bakante nga talento sa pungsod.
