ROXAS CITY – Ginsabat ni Lourdes Casipe Land Transportation Office (LTO) Chief sang Roxas City District, ang pila ka mga reklamo angut sa ginapahayag nga madugay nga serbisyo nga ginahatag sang ila ahensya ilabi na sa mga nagapila sa guha sang ila talatapan.
Sa interview sang Bombo Radyo kay LTO Chief Casipe, ginpahayag sini nga indi lamang isa ka transaksyon ang ila ginahimo kada adlaw kag wala sila nagakulang sa pagpahanumdum sa publiko nga kun mahimo maghatag sang malawig nga pasensya bangud ginahimo man nila ang ila obligasyon nga mahatagan sang serbisyo ang isa kag isa.
Suno kay Casipe, sa mga walk-in nga luyag magrenew sang ila mga lesensya insigida ginaprint nila ini apang indi malikawan nga mag-angkon sang problema sa ila printer bangud sa kadamuon nga ginaprint adlaw-adlaw.
Sa tion nga nagakatabo ang kasubong sini nga sitwasyon, ginahatagan nila ini sang schedule for appointment, kag mahimo man sila suno diri nga magtawag sa numero sang costumer service sang ahensya agud indi mausik ang ila tyempo sa pagpila.
Mahibaluan nga nag-abot sa ila talatapan ang mga cards sadtong Abril 15 kag padayon ang pagprovide sang central office agud dalayon ang pagrelease sa mga drivers.
Ginpahayag ni Casipe nga sarang macater sang ila ahensya ang maximum 200 cards sa isa ka adlaw, apang kun kaisa wala na ini nalab-ot.
